Александр Евстифеев чоҥымо пашам виктарыме шотышто регионысо штабын заседанийжым эртарен
Александр Евстифеев калыкле проект кышкарыште, индивидуал программым шыҥдарыме радам дене келшышын объект- влакым чоҥымо годым графикым тӱрыс эскераш кӱштен. Теҥгече Марий Элым вуйлатыше Александр Евстифеев чоҥымо, пужен ыштыме, олмыктымо пашам виктарыме шотышто регионысо штабын заседанийжым эртарен. Тудо палемден: калыкле проект- влакым шыҥдарыме пашам республике чолган шукта. Тений регионысо проект- влакым шыҥдараш 9 миллиардат 500 миллион теҥгем колташ палемдалтеш. Ятыр объектым чоҥыман, нуным качественно да жапыштыже ыштыман. Проект да индивидуал программе- влакым шыҥдарыме паша нерген промышленность министр Станислав Крылов увертарен. Тудын мутшо почеш, кызытсе жаплан ик миллиардат 600 миллион теҥгем ойырымо. Тидыже талукаш лимитын 16 утла процентше лиеш, але икымше кварталын планже дене 81 процент. Регионысо проект- влак кышкарыште 21 объектым ыштен шукташ кӱлеш. Индивидуал программе кышкарыште тений федерал бюджет гыч ойырымо шийвундо дене 7 мероприятий шыҥдаралтеш. Кугу объект коклаште- аэропортым чоҥымаш, Козьмодемьянск воктене причалым ыштымаш да Йошкар-Олаште автовокзалым нӧлтымаш улыт. Советский районышто, Волжск ден Звенигово олалаште вӱдым ситарыме объектлаште паша шукталтеш. Волжскышто азам ыштыме пӧлка чоҥалтеш. Чыла объектыштыжат пашам жапыштыже шуктыман.- каласен республикым вуйлатыше. Сӧрымым шуктыдымо подрядчик- влакым мут кучаш шогалтыман. «Кызытсе школ» да «Ӱдырамаш- влаклан пашаверым муаш полшымаш» регионысо проект- влак нерген туныктыш министр Наталья Адамова ойлен. Кызыт ныл йоча сад чоҥалтеш. Идалык мучаш марте 547 у ясле вер лийшаш. Тыгак Медведевыште у школым нӧлтат, Марий Турек районысо Сардаялыште тӱҥ школын у занийже чоҥалтшаш.
