Марий Турек районысо Тат-Китне фельдшер-акушер пунктын модульжым монтироватлыме паша мучашлалтын

Марий Турек районысо Тат-Китне фельдшер-акушер пунктын модульжым монтироватлыме паша мучашлалтын
             Марий Турек районысо Тат-Китне фельдшер-акушер пунктын модульжым монтироватлыме паша мучашлалтын. Тудо «Тазалыкаралтышын первичный звеножым уэмдымаш» регионысо программе кышкарыште нӧлталтеш. У ФАП-ыште газым ситарыме сеть деке ушаш, оборудованийым да мебельым налаш кодын. Республикыштына тений чылаже ныл объектым чоҥаш палемдыме: Тат-Китнысе ФАП деч посна Юрино районысо эмлыме вер, Силикатный посёлко ден Кокшайск селаште врач амбулаторий- влак чоҥалтыт. Силикатныйыште тӱҥ чоҥымо пашам шуктымо: пырдыжым, леведышым, тӱжвал вӱд пуч ден канализацийым, кӧргыштӧ электромонтаж пашам шуктымо Кызыт пырдыжым плитке дене комыжлат, кӱварыште керамогранит плитке шаралтеш, кундемым тӱзландарат. Пашам кеҥежым мучашлаш шонат. Кокшайскыште шыжым ыштен пытараш шонат. Юрино районысо эмлыме верын поликлиник пӧлкажым чоҥымаште тӱжвал да кӧргӧ пырдыжым нӧлтат, теплотрассым ыштат. Модернизаций программе почеш 2025-ше ий марте республикыштына чылаже тазалыкаралтышын 7 объектшым чоҥышаш улыт. Тымарте Волжский районысо Учимсолаште ФАП-ым, Краснооктябрьскысе врач амбулаторийым пашаш колтымо.
           Фото: Тазалыкаралтыш министерстве.

Прошлые выпуски