Морко корным вӱд мушкын
«Звенигово- Шолеҥер- Морко» корно йымач вӱдым колташ пыштыме пуч йыр вӱд мушмылан кӧра корно шаланен. Кугыжаныш автоинспекцийыште увертарыме почеш, трассын 38-ше меҥгыштыже корным да корно тӱрым вӱд мушкын колтен. Тидлан кӧра 37-ше гыч 74-ше меҥге марте корно ужашым петырыме. Аварий верыште теҥгече 21 еҥ да 13 технике пашам ыштен. Тиде корно ужашым «Памар-Коркатово» да «Суслонгер- Филиппсола» корно дене эртен каяш лиеш. Марий Элым вуйлатыше кӱрылтшӧ корно ужашым кӱчык жапыште олмыкташ тӱҥалына манын каласен. Происшествийын амалжылан трук левештымаш да вӱдым колтышо пучын вӱд куатым сеҥен кертдымыже шотлалтеш. Калыклан лӱдыкшӧ уке. «Марий Эл Дорстрой» предприятий корным тӧрлаш ончылгоч кӱлеш материалым шапашлен. Республикым вуйлатышын вертарымыже почеш кызыт пашазе- влак вӱд мушмо келге верым тыгыде кӱ дене петыреныт. Пучым тергеныт, тудо пудырген огыл. Вӱд утыж дене ок шарле гын, транспортым риверсивно колтат. Ситуацийым Марий Эл Правительстве ден Транспорт министерстве контрольышто кучат.
Фото: Юрий Зайцевын телеграмм-каналже.
Фото: Юрий Зайцевын телеграмм-каналже.
