Пӧрт пырдыжеш увертарымаш кагазым пижыктет- штрафым тӱлыктат
Оласе пӧрт пырдыж, вӱд йогымо пуч, инженер сооружений, меҥге, корно пале, транспорт чарныме павильонышто пижыктылме рекламе увертарымаш- влак олан тӱсшым йӧршын амыртат. Оза- влак тудым эрыкташ тыршат гынат, лектыш шагал. А увертарымашым тыге пижыктылмаш административный правонарушенийлан шотлалтеш. Йошкар-Олам тӱзландарыме правил почеш, ола кумдыкышто шкевуя тыгай увертарымашым, плакатым, вывескым палемдыдыме верыште пижыкташ чарыме. Тений гына оза- влаклан увертарымаш деч эрыкташ 600 кӱштымашым колтымо. Тудым шуктыдымылан штрафым тӱлыктат. Уверым пижыктыше- влакымат мут кучаш шогалтен кертыт. Теве кокымшо декабрьыште Гагарин проспектыште ик еҥ пижыктыл шогышо пӧръеҥым ужын да полицийым ӱжыктен. Нуно толын, протоколым возеныт. Вес кечынже административный комиссий йодышым ончен лектын да пижыктылше еҥдан 600 теҥге штрафым тӱлыкташ пунчалым луктын. Оксаже кугу огыл гынат, мут кучаш шогалтыме фактше шерге. Тыгай паша чӱчкыдынрак ышталтеш гын, ала пижыктылшыжат шагалрак лиеш ыле.
