Радион кечыжым теҥгече Йошкар-Олаште куштылго атлетике эстафете дене палемденыт
Радион кечыжым теҥгече Йошкар-Олаште молгунамсе семынак куштылго атлетике эстафете дене палемденыт. Тений тудо 78-ше гана эртен. Куржталмаш тыгак Кугу Сеҥымашын 79-ше идалыкшылан пӧлеклалтын. Спорт-туризм министерствын ончыктымыжо почеш стартыш 308 куржталше лектын. Нуно вуз, ссуз, спортклуб, район, ола да ял школ ден тӧнежла гыч 22 командыш ушненыт. Игече ночко да йӱштӧ лийын гынат, спортсмен- влакын кумылыштым волтен огыл. Икымше тӱшкаш вуз, спортклуб, промпредприятий ден физкультура коллектив-влак пуреныт. Тушто «Акпарс-МарГУ» команде икымше верыш лектын. Профессионал туныктымо тӧнеж коклаште Йошкар-Оласе технологий колледж ончылно лийын. Муниципал образованийла коклаште Медведево район сеҥен. Йошкар-Оласе школла кокла гыч шымше номеран школ эн тале лийын, районласе школ гыч Пӧтъял школ чулымлыкым ончыктен.
Фото: Спорт-туризм министерстве.
Фото: Спорт-туризм министерстве.
