Сеҥымаш парадын тӱҥ репетицийже лийын
Теҥгече рӱдӧ олаштына Йошкар-Ола гарнизонысо войска- влакын торжественно эртымашыштын генеральный репетицийже лийын. Мероприятийыште Марий Элым вуйлатыше Александр Евстифееват участвоватлен. Кугу Ачамланде сарыште сеҥымылан 75 ий темме лӱмеш 24-ше июньышто эртышаш пайрем шествийлан ошкыл эртыше колоннат ямдылалтеш. Тушто 10 утла парад расчёт лийшаш. Колоннышто верысе ракет соединенийын офицерже, сержантше да салтакше- влак лийыт. Тренировкышко дивизийын тӱжем утла военнослужащийже лектын. Механизированный колоннышто военный да специальный технике кая. Тудын радамыште боевой дежурствым наҥгайыше, инженер полышым пуышо, МИОМ маскировкын машиныже- влак, «Тайфун-М» противодиверсионный машина, «Выстрел» бронеавтомобиль, бронетранспортёр да моло ораван технике лиеш. Икымше гана Кугу сарысе фронтлан штандартше дене да 1942-шо ийысе 76 миллиметран дивизионный пушко дене военнослужащий- влак эртат. Пайрем таҥошкылмашке черын симптомжо деч посна улшо военносужащийже- влакым пуртымо. Чыла трениовко санитар лӱдыкшыдымылыкым эскерен шукталтын. Эпидемиологий сӱретым шотыш налын, Йошкар-Ола гарнизонын войскаже- влак ончаш толшо- влак деч посна эртат. Республикысе чыла калыклан да уна- влаклан 24-ше июньышто 8 гыч 9 шагат марте «Марий Эл» ГТРК да вес телерадиокомпаний да социал сеть- влак вияш трансляцийым ончыктат. Кастене 18 да 21 шагатлан уэш ончаш лиеш.
