Таче- Марий Тиште кече

Таче- Марий Тиште кече
Таче Марий тиште кече палемдалтеш. Республикым да Марий Эл Правительствым вуйлатыше Александр Евстифеев марий кундемысе калыкым тиде кугыжаныш пайрем дене саламла. Лач тиде кечын 1775-ше ийыште икымше марий грамматике савыкталт лектын. Тиде марий калыкын историйыштыже кугу событий лийын да марий возыктышлан, марий литератур йылмылан вияҥаш тӱналтышым пуэн. Тиде жап марте кужу корным эртыме. Марий йылме литератур формыжым муын, моторлыкшым да поянлыкшым поген, кугыжаныш йылме лийын. Йылме тӱвырашке, калыкын эн тӱҥ поянлыкшым арален кодымашке да вияҥдымаште надырым пыштыше писатель, поэт, журналист- влакын лӱмыштым ойлен пытараш ок лий. Йылме йодыш кызытат пӱсын шога. Тӱп калык- влакын йылмыштын тӱнямбал идалыкыштыже правительстве, туныктыш да тӱвыра орган- влак марий туныктышо, писатель, артист, тӱвыра пашаеҥ да мер деятель- влаклан тӱрло полышым пуэн шогат. Тораште илыше марий- влакат ӧрдыжеш огыт код. Идалык еда Марий тиште кече кугу пайрем семын эрта. Тиде тыгак лийшаш. Уло чон дене тиде шочмо вер деке йӧратымаш дене чыла калыкым ушен шогышо, пале событий дене саламлем,- ойлалтеш республикым вуйлатышын саламлымашыштыже.

Прошлые выпуски