Лӱмлӧ эрвел марийым пытартыш корныш ужатеныт
Кодшо кугарнян Башкортостаныште Марий Элын полномочный представительже, Пошкырт элысе марий- влакын «Эрвел марий» калыкле- тӱвыра автономийыштым вуйлатыше Павел Бикмурзин ӱмыр лугыч лийын. Тудо 69 ияш лийын. Павел Исадыкович Мишкан районысо Тошто Акбулат ялыште шочын. Урал кугыжаныш университетын философий факультетшым тунем пытарен. Паша корныжым Моско технологий институтын Уфа филиалыштыже тӱналын. Философий шанче кандидат, 40 утла шанче пашан авторжо. 1995-ше ий годсек Башкортостанысе марий мер толкыным вуйлатен. 1999-ше ий гыч Пошкырт элыште Марий Элын полномочный представительжылан ыштен.
