«Калыкын чонжо» премий дене палемдалтше- влакын лӱмышт пале лийын
Республикыштына калык усталыкыш пыштыме надырлан куд премийым пуымо. Марий Элым вуйлатыше Александр Евстифеев 2020-шо ийлан Правительствын «Калыкын чонжо» премийжым пуымо шотышто распоряженийым пеҥгыдемден. «Калык куштымаш» номинацийыште премийым Курык марий районысо калык тӱвыра рӱдер гыч «Мистерия» образцовый хореографий студий гыч Ольга Музурова- Поддубная налеш. «Калык мурымаш» корно дене Килемар районысо Арде тӱвыра пӧртын «Россияночка» ден «Май» мурышо калык ансмабль- влакым вуйлатыше Александр Новосёловлан пуаш ыштыме. «Калык тӱвыра» номинацийыште Советский районысо Кукмарий тӱвыра пӧртын «Весела кумыл» калык фольклор ансамбльжым вуйлатыше Надежда Волковам палемдыме. «Калыкле семӱзгар сем» номинацийыште Курык марий районысо кӱслезе- влакын «Шика-вика» образцовый аснмабльышт налеш. «Театр усталык» корно дене «Карнавал» йоча театр студийым вуйлатыше Римма Виногорова, «Кидпаша сымыктыш аланыште калык мастар» номинацийыште «Чудеса в решете» калык кидпаша усталык студийым вуйлатыше Ирина Чугунова премий дене палемдалтын.
