Марий Элым вуйлатыше Российысе чоҥымаш министр дене вашлийын

            Марий Элым вуйлатыше Российысе чоҥымаш министр дене республикысе олалаште очистной сооружений- влакым чоҥымо йодышым каҥашен. Вашлиймаш Москошто эртен. Чоҥымаш, илыме вер да коммунал озанлык министр Ирек Файзуллин Марий Элым да Калмыкийым вуйлатыше- влак Юрий Зайцев ден Бату Хасиков дене вашлийын. Нуно «Регионлаште илыме вер да оласе кумдык» калыкле проектым шыҥдарымым да илыме верым чоҥымым лончыленыт. Кок регионжат 8 тылзыште чоҥымо пашам шуктымо лектыш дене 30 эн сай регион- влак радамыш пуреныт. Тиде жапыште Марий Элыште 346 тӱжем квадрат метр илыме верым ыштен шуктымо, кодшо ийысе деч 62 процентлан шукырак. А Калмыкыийыште кодшо ийысе деч 33 процентлан шукырак чоҥымо да 88 тӱжем квадрат метрым ыштен шуктымо. Кызытсе илыш саманым ончыде палемдыме планым илышыш шыҥдарен, ончыко кайыман,- каласен Ирек Файзуллин. Вашлиймашышыте каҥашыме эше ик темыже Йошкар-Олаште да Волжскышто канализацийын очистной сооруженийжым пужен ыштымаш дене кылдалтын. Шуктышаш паша Йошкар-Оласе 282 тӱжем еҥын да Волжскысо 55 тӱжем еҥын илышыжым саемдаш да Юл эҥерыш йоктарен колтымо вӱдым норматив марте шукташ йӧным пуа.
             Фото: Марий Элым вуйлатышын организаций да аналитик виктемже.

Прошлые выпуски