Москошто Марий Элын ончерже ден концертше лиеш
Марий Элын 100 ияш лӱмгечыжым пайремлыме кышкарыште Александр Евстифеевын тӱҥалтышыже почеш Москошто Марий Элын кечыже- влак эртат. Мутлан, 23-шо октябрьыште Кугыжаныш Кремль Полатыште торжественный мероприятий лиеш. Тудын тӱҥ ужашыже семын республикысе профессионал коллектив- влакын ончыктымо кугу пайрем концерт лиеш. Билетым кызытак ужалаш тӱҥалыныт. Тиде кӱлешан событийлан ямдылалтме шот дене Республикысе Правительстве пӧртыштӧ оргкомитетын икымше заседанийже эртен. Тудым Правительстве вуйлатышын икымше алмаштышыже Михаил Васютин вӱден. Тудын мутшо почеш, мероприятий икмыняр ужаш гыч шога: «Марий кундем- Российын ямже» выставке да торжественный концерт гыч. Тӱвыра министр Константин Иванов ешарен: концертыште Эрик Сапаев лӱмеш опера да балет акадмический театр, Шкетан лӱмеш калыкле драма театр, Яков Эшпай лӱмеш Марий Кугыжаныш филармоний, Палантай лӱмеш тӱвыра да сымыктыш колледж, Курык марий кӱслезе-влак ансамбль участвоватлат. Евсеев лӱмеш калыкле тоштерым вуйлатыше Светлана Зверева палемден: ончер пӱтынек марий кундемлан пӧлеклалтеш: историйым, пӱртӱсым, туризмым, профессионал усталык ден искусствым, туныктымо, шанче, спорт, ял озанлыкым почын пуа. Михаил Васютин лишыл жапыште докладын, презентацийын, видеоматериалын проектыштым ончыкташ, фотозоным сӧрастараш да сувенир лавке- влакым ямдылаш кӱштен.
