Тений 16 аварийный пӧрт гыч 380 еҥ у илыме веран лийшаш
Кодшо идалык мучашыште Йошкар-Олаште «Аварийный илыме верла гыч калыкым кусарымаш» адресный муниципал программым пеҥгыдемдыме ыле. Тудо 2025-ше ий марте шыҥдаралташ тӱналеш. Тиде жапыште ныл йыжыҥ дене 63 шуко пачеран тошто пӧрт гыч тӱжемат 697 еҥым кусараш палемдыме. Чылаже 20 тӱжемат 400 квадрат метр кумдык аварийный пӧртым кораҥдыман. Тений икымше йыжыҥыштыже 16 пӧрт гыч 380 еҥ у илыме веран лийшаш. Тидлан ЖКХ-м пужен ыштыме фонд 132 утла миллион теҥгем, республике кок миллионат пелым, Йошкар-Ола 19 миллион теҥге оксам ойыреныт. Чоҥымо пӧртыштӧ у пачерым социал найм ойпидыш почеш пуат. Кусарыме еҥ- влаклан у пӧртын адресше: Петров уремысе 32-шо пӧрт. Тудым тений декабрь марте ыштен шуктышаш улыт.
