Республикым вуйлатыше паша дене Юрино районышто лийын
Республикым вуйлатыше Александр Евстифеев паша дене Юрино районыш мийымыж годым Юркино посёлкышто олмыктымо деч вара уэмдыме Тӱвыра пӧртым да да райрӱдыштӧ Сергей Лосев лӱмеш кыдалаш школым ончен лектын. Юркинысе тӱвыра пӧртым 30 ий ончыч чоҥымо. Тудым 300 еҥлан келыштарыме улмаш. Но туддеч вара ик ганат капитально олмыктымо огыл. Леведышын вӱдым колтымыжлан кӧра, зданий шолдырген, 2002-шо ий гыч пашам ыштымым чарнен. Чыла мероприятийым школышто да книгагудышто эртарыме. Пӧртын кӱлешлыкшым шотыш налын, тудым моло вич тӱвыра пӧрт дене пырля эртыше ийыште олмыктымо. Леведышым олмыкташ 8 миллионат 500 тӱжем теҥгем ойырымо. Республикым вуйлатыше олмыктымо пашам умбакыжат шуяш кӱштен, поснак кокымшо пачашыште. Александр Евстифеев Юринысе кыдалаш школышкат миен. Тиде школым 1932-шо ийыштак негызлыме. Тудлан тиде районышто шочшо, лӱмлӧ журналист- международник да кугыжаныш деятель, ТАСС увер агентствын ончычсо генеральный директоржо Сергей Лосевын лӱмжым пуымо. Школын кызытсе пӧртшым 1981-ше ийыште чоҥымо. Кызыт тушто 460 йоча тунемеш. Кодшо ийын тудын актовый залжым олмыкташ вич миллионат 700 тӱжем теҥгем ойырымо ыле. Республикым вуйлатыше класслам ончен, тунемше- влак дене мутланен. Тений школ негызеш «Точка роста» гуманитар да цифран профиль дене туныктымо рӱдер почылтшаш.
