Таче прокуратуро пашаеҥ- влакын кечышт

              Таче Марий Элым вуйлатыше Александр Евстифеев Российысе прокуратуро пашаеҥ- влакын профессионал пайремыштлан пӧлеклалтше торжественный погынымаште участвоватлен. Тудо палемден: эртыше идалык калыкланат, республикын экономикыжланат кугу тергымаш лийын. Тудо кажне кечысе илышым вашталтен, организаций ден озалык- влакын пашашкышт вашталтышым пуртен. Александр Евстифеев палемден: прокуратура орган- влак регион ончылно шогышо задаче- влакым виктарен колташ полшат. Прокуратура шке тӱткышжым граждан- влакын пашалан праваштым аралымылан, шке жапаштыже пашадарым тӱлымӧ йодышлан ойыра. Тыге 46 миллион теҥге пашадар парымым пӧртылтымӧ.
               Тыгак инвалид-йоча, тулык йоча- влакын праваштым аралыме, калыкле проект- влакым шыҥдарымаште правонарушенийым рашемдымылан вер ойыралтеш. Мутлан Йошкар-Оласе кок уремыште корным начар олмыктымым пален налме. Прокурор- влакын мерым ыштымыштлан кӧра подрядчик шке кӱшешыже корным уэш олмыктен. Икманаш 2020-шо ий ятыр показатель дене сайын эртен, теният тыгак лиеш манын республикым вуйлатыше ӱшаным каласен.
               Пайрем кечын поро йӱла семын кугыжаныш награде- влакымат кучыктымо. Республикысе прокурорын кугурак полышкалышыже Сергей Завойских «Марий Элын сулло юристше» лийын. Правительствын Чап Грамотыжым республикын прокуроржо Сергей Беляков ден прокуратурын пӧлкажым вуйлатыше Сетлана Демидова налыныт. А Шернур районын прокуроржын алмаштышыже Владимир Кибардинлан Марий Элым вуйлатышын Тауштымашыжым увертарыме.

Прошлые выпуски