50 у автобусым Марий Элым вуйлатышылан презентоватлыме
Марий Элым вуйлатышын тӱҥалтышыже почеш налме 50 у автобус линийыш лекташ ямде улыт. Нуно муниципал кокласе да оласе маршрутлаште пашам ышташ тӱҥалыт. Тымарте транспорт министерстве калыкым шупшыкташ свидетельствым налаш конкурсым эртарен. Тушто сеҥышыш Троллейбус транспорт муниципал предприятий лектын. Марий Элым вуйлатыше торжественный мероприятийыште участвоватлен. Тудлан Ленин площадьыште витле автобусым презентоватлыме да свидетельствым налше ныл маршрут дене коштын ончымо. Кодшо ийын правительствын ик заседанийышыже автобусым налаш оксам ойыраш пунчалым лукмо ыле. Теве ынде торжественный жап шуын - 50 автобус верыште улыт. Мый тендам саламлем, каласен Юрий Зайцев оласе калыклан. Йошкар-Олан мэрже Евгений Маслов олалан тыгай пӧлекым ыштымылан Главалан тауштен да ик-кок ий ончыч ме тидын нерген шоненат кертын огынал манын. Йӧнан автобус- влак 55 еҥым наҥгаяш келыштаралтыныт. Тушто 17 шинчыме вер, шарыман кум кресле да инвалидлан ик вер уло. Юрий Зайцев ӱшаным каласен: автобус- влакым пашаш колтымо дене транспортым ситарыме йодышым саемеш, ситыдымаш- влакым шагалемдаш полша.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
