Памарыште Сеҥымаш паркым умбакыже тӱзландарат
Волжский районысо Памар селаште Сеҥымаш паркым умбакыже тӱзландарат. Тудым кодшо ийынак торжественно почмо ыле, но чолга еҥ- влак теният пашам умбакыже шуеныт. Эн ончыч корно могыр гыч Паркыш пурымо верым чоҥеныт. Тудо ынде тора гыч волгалтеш. Ик велым «Сеҥымаш Парк» манын возымо, вес велым «Тыланда тыныслык да порылык лийже» шомакым вераҥдыме. Верысе калык шке вийже дене тротуар воктене тыгыде пӱнчым, кожым, пызлевондым, грушым да локамам шынден, ешарен теҥгылым вераҥденыт. Пашам умбакыжат шуяш палемдыме.
