Азам ыштыме у пӧрт декабрьыште почылтеш
У Перинатал рӱдер декабрьыште почылтшаш. Тидын нерген Республикым вуйлатыше Александр Евстифеевлан тазалыкаралтыш министр Марина Панькова увертарен. Тушто тӱшка чоҥымо паша мучашлалтын. Икымше ноябрьлан пӧлемлаште отделке пашам ыштен пытарышаш улыт. Коммуникаций сетьлаште пашам шуктымо, вентиляций, кондицирований, электроснабжений системым ышташ кодын. Икымше пачашыште лишыл жапыште оборудованийым шындаш тӱҥалыт. Объектым чоҥашлан чылаже ик миллиардат 500 миллион теҥгем палемдыме. Республикым вуйлатыше рӱдерын пӧлемже- влакым ончен лектын. Тудо палемден: оборудованийым вераҥдыме пашат кугу тӱткышым йодеш, персоналым тудын дене пайдаланаш туныктыман. Тений мучашлан у зданийым тичмаш пашаш колтена, тоштыжымат уло куат дене кучылташ тӱҥалына. Перинатал рӱдерын тӱҥ врачше Ирина Виноградова коллектив лӱм дене Республикым вуйлатышылан таум каласен. Чылан тудым ыштен шуктымым ӱшанен-ӱшаныде вученна, персонал у оборудований дене пашам ышташ тунемаш тӱҥалын, - манын тудо. Александр Евстифеев декабрь кыдалне куанле татым эртарена, манын.
