Воспитатель- ик эн поро, кӱлешан, тидын годымак, неле профессий

Воспитатель- ик эн поро, кӱлешан, тидын годымак, неле профессий
Таче Российыште воспитательын да школ деч ончыч шинчымашым пуышо чыла пашаеҥ- влакын кечышт палемдалтеш. Кызыт тыршыше да ветеран- влакым республикым вуйлатыше профессионал пайремышт дене саламла. Воспитатель ик эн поро, кӱлешан, тидын годымак неле профессий. Школ деч ончыч туныктышо педагогын пашаже кугу ответственностым да вий-куатым йодеш. Уш-акыл, пашам йӧратымаш, кызытсе жаплан келшыше, палыше специалист лияш тыршымаш пагалымашым луктеш. Марий Элыште школ деч ончыч туныктымашын качествыжлан кугу тӱткыш ойыралтеш. Республикыште 200 муниципал, федерал, кугыжаныш огыл йоча сад уло. Тушто 40 тӱжем наре йоча шуаралтеш. Нунын дене кум тӱжем утла педагог пашам ышта. Тиде- воспитатель, музыкальный вуйлатыше, туныктышо-логопед, психолог, физкультура инструктор, повар да молат улыт. Пагалыме воспитатель, пашаеҥ да ветеран- влак! Поро шӱм-чонланда, пашам йӧратымыланда, усталыкланда, изи еҥ- влакын уш-акылышыкышт корным муын моштымыланда таум ойлем. Сеҥымашым, тазалыкым, еш пиалым тыланем,- ойлалтеш республикым вуйлатышын саламлымашыштыже.

Прошлые выпуски