Марий Эл гыч 4 организаций Президентын грантшым налеш
Граждан обществым вияҥдаш Россий Президентын грантшым налаш тенийсе икымше конкурсым иктешлыме. Ныл миллиард утла теҥге президент грантым уло Россий гыч кок тӱжем утла организаций налеш. Нунын коклаште Марий Эл гычат ныл сеҥыше уло. Тиде- граждан- влак да нунын ешыштлан правовой полышым пуышо «Наша инициатива» коммерцийдыме автоном организаций, «Усталык пашам ыштыше инвалид- влакын товариществышт» регионысо мер ушем, «Театр пашаеҥ- влак ушемын» Марий Элысе пӧлкаже да теҥыз дене кылдалтше пашам вияҥдаш полшышо республикысе «Паллада» парус клуб йоча мер ушем. Социал вияҥмаш министерствын увертарымыж почеш, эрла 26-шо февраль гыч кокымшо конкурсыш йодмашым налаш тӱҥалыт. Тудым 31-ше март марте пуаш лиеш.
