Ойгандарыше увер
Кугурак тукым Марий Кугыжаныш университетын икымше ректоржо Виктор Эдуардович Коллам сайын шарна. Чаманаш логалеш, кужу черанен кийыме деч вара теҥгече тудын шӱмжӧ кырымым чарнен. Тудын лӱмжӧ дене Марий университетым почмо да вияҥме жапше кылдалтын. Виктор Эдуардович биологий наука доктор, профессор, Тӱнямбал наука академийын действительный членже, Марий АССР да РСФСР наукын сулло деятельже лийын. Тудо 400 утла шанче публикацийын, 10 патентын, 40 автор свидетельствын авторжо. Виктор Колла 1925-ше ийыште Пермь олаште шочын. 1971-ше гыч 1982-шо ий марте МарГУ-н ректоржо лийын.
