Республикысе балет школым почмылан 20 ий темын

Республикысе балет школым почмылан 20 ий темын
Эрик Сапаев лӱмеш опера да балет театрыште республикысе балет школым почмылан 20 ий темме лӱмеш пресс-конференций эртен. Тушто тӱвыра министр Константин Иванов, Бауманский лицейын директоржо Григорий Пейсахович, Паланатй лӱмеш тӱвыра да сымыктыш колледжын директоржо Алексей Паскичев, театрын балет труппыжым вуйлатыше да балет школын туныктышыжо Владимир Шабалин лийыныт. Ятыр ий ончыч «Бауманский лицей пелен тӱвыра колледжын хореографий пӧлкаже» школым почаш шонымашым Константин Иванов илышыш шыҥдарен. Тудо шонымашын шочмыжо гыч, пашан кузе тӱналмыже да могай сеҥымашыш шумо нерген каласкален. Отделенийын ойыртемже тушто: тудо лицейын туныктымо общеобразовательный программышкыже пурталтын. Тыге изи гычак йоча- влак артист профессийым налыт. 20 ий жапыште ятыр талантан артист кушкын да театрыште пашам ышташ тӱналын. Марий балет Российысе веле огыл, йот элласе ончышо- влакынат кумылыштым савырен. Тидын нерген ятыр лӱмлӧ конкурслаште сеҥен налме награде- влак ойлат. Вигак кум артист балет искусствышто «Душа танца» кӱкшӧ премий дене палемдалтын. Тиде- Константин Иванов, Ольга Челпанова да Константин Коротков. Кызыт театрын чыла гаяк артистше тиде балет школым тунем пытарыше- влак улыт. Школын 20 ияш лӱмгечыжлан пайрем концерт пӧлеклалтеш. Тудо театрыште 27-ше октябрыште 16 шагатлан лиеш.

Прошлые выпуски