Республикысе талантан йоча- влак ик цикл дене тунемаш тӱҥалыт
Республикысе талантан йоча- влак ик цикл дене тунемаш тӱҥалыт. Калыкле президент сымыктыш школым Палантай лӱмеш тӱвыра да сымыктыш колледж деке ушымылан кӧра тӱвыра да сымыктыш аланыште туныктымо кластер шочеш. Тудым кызытеш тыге лӱмдаш шонат: талантан йоча- влаклан калыкле сымыктыш лицей. Тунемме тӧнеж- влакым пужен ыштыме йодышым Республикысе мер палатын площадкыштыже йыргешке ӱстел йыр чумыргышо- влак каҥашеныт. Нуно палемденыт: пужен ыштыме деч вара йоча- влак сымыктыш ден тӱвырам келгын тунемын сай качестван шинчымашым налыт, а тунем пытарымеке шке шинчымаш ден талантыштым марий театрла ден филармонийын коллективлаштыже кучылт кертыт. Колледжым вуйлатыше Алексей Паскичевын мутшо почеш Калыкле президент сымыктыш школ тӱҥалтыш гычак тыге ыштыме лийын: тудым тунем пытарыше- влак шинчымашым умбакыже колледжыште налыт. Схема пашам ыштен, но пайдалыкше иземаш тӱҥалын. Южо ийлаште выпускник- влакын пелыж наре моло тӱнемме тӧнежлашке каеныт. Тыге нуным сымыктыш школышто туныкташ кучылтмо окса яраш каен манаш лиеш. Погынышо- влак чыланат кок тӧнежым ушаш лийме дене келшеныт.
