Ушкалым робот лӱшта

        Марий Элысе ӱшанле экономике ситуаций ял озанлык предприятий- влаклан кугу инвестиций проект- влакым сайын шыҥдараш йӧным ышта. Кугыжаныш полыш, республикын правительствыже да агропромышленный предприятийлан вуйлатыше- влак кокласе сай кыллан кӧра ял озанлык вияҥеш, у технологий- влак шыҥдаралтыт. Теве теҥгече Медведево районысо У Кома ялыште Марий Элыште икымше роботизированный ферме ышташ тӱҥалын. Тудо 280 вуй вольыклан келыштаралтын да сай качестван шукырак шӧрым лӱштен налаш полша. Кӱкшӧ технологиян фермым почмаште Марий Элым вуйлатыше Александр Евстифеев лийын. 
      «Семёновский» племзаводын шыҥдарыме «Шӧрым пуышо вольыкым ашныме пашам вияҥдымаш» инвестиций проект производство куатым кумдаҥдаш, кормам ямдылыше ял озанлык техникым налаш, вольык озанлык комплекслан оборудованийым налаш виктаралтын. Тиде пашалан 324 миллион теҥге окса кучылталтеш. Племзаводын генеральный директоржо Александр Козырев дене пырля Республикым вуйлатыше Александр Евстифеев производствым ончен лектын, пашазе- влак дене мутланен. Директор палемден: тиде фермым пел ийыште чоҥымо. Ныл робот 70 вуй ушкалым обслуживатла. Ушкалым суткаш кум гана лӱштат, 8 шагат еда. Робот ушакалын чипше гыч кӱлеш уверым лудын налеш да компьютерыш колта. Тыге могай жапыште мыняр шӧрым лӱштымӧ нерген чыла уверым палаш лиеш. Чыла пашам тора гыч эскераш йӧн уло. У техникым кучылтмо икымше арняште гына шӧр лӱштыш 10 процентлан ешаралтын. Ферме дене палыме лийме годым республикым вуйлатыше ял озанлык техникым ончен, лукмо продукций дене палыме лийын. Племзаводын производствым кумдаҥдымыже у пашаверым почаш да экономикым вияҥдаш полша манын тудо. Республикыштына тиде шӧрым лукшо ик эн кугу предприятий. Кокла пашадарат республикысе деч кугурак. Тыште 8 тӱжем вуй тӱкан шолдыра вольыкым ашнат, кум тӱжемат пелыже- лӱштымӧ ушкал, 25 тӱжем тонн утла шӧр лектеш. Тидыже республикыште икымше вер.

Прошлые выпуски