Йошкар-Оласе Ширяйково микрорайонышто Изи Какшан эҥерын йогын корныжым эрыктат
Йошкар-Оласе Ширяйково микрорайонышто Изи Какшан эҥерын йогын корныжым эрыктыме мероприятий шукталтеш. Тиде пашам тений тӱҥалме. Заказчикше- республикысе пӱртӱс поянлык министерстве улеш. Проект да смете документацийым ямдылыме, тудо экспертизым эртен. Кызыт технологий корным да площадкым ыштыме, эрыктен лукмо вӱдйошкыным оптымо вер- влак ышталтыт. Йошкыным шушаш ийын лукташ тӱҥалыт. Эрыктыме пашан акше 48 миллион теҥгем эрта. Пашам 2030-шо ийлан мучашлыман. Эрыктыме кумдык кум гектарат пелыш погына, 50 тӱжем кубометр йошкыным лукман. Куд тӱжем еҥлан илыме экологой йӧн саемеш.
Фото: Пӱртӱс поянлык министерстве.
