Йошкар-Олаште ик скверлан Владимир Жириновскийын лӱмжым пуымо
Йошкар-Олаште ик скверлан Владимир Жириновскийын лӱмжым пуымо. Тудо олан рӱдыштыжӧ Комсомол уремыште 132-шо пӧрт деч тораште огыл, Шкетан театр да Ленин лӱмеш площадь ваштареш верланен. У лӱм нерген решенийым тений февральыште оласе объект- влаклан лӱмым пуаш темлымашым ончымо шотышто комиссийын заседанийжын протоколжо негызеш лукмо. Скверлан у лӱмым пуымо нерген документеш кидпалыжым ола мэрын пашажым шуктышо Антон Трудинов шынден. Владимир Жириновский 1946-шо ийын 25-ше апрельыште шочын да 2022-шо ийын 6-шо апрельыште илыш гыч каен. Тудо совет да российысе политике деятель, Российысе либерал-демократий партийым негызлыше да ятыр ий вуйлатыше лийын.
Фото: ВНД архив.
Фото: ВНД архив.
