Эрла Йошкар-Олам пайрем шӱлыш авалта

Эрла Йошкар-Олам пайрем шӱлыш авалта
              Эрла Йошкар-Олам пайрем шӱлыш авалта. Оласе да республикысе калык, толшо уна- влак икмыняр пайремым палемдаш тӱналыт. Эн кугужо, мутат уке, Пеледыш пайрем. Тудо Россий кӱкшытан. Молан манашан гын, йӱла семын Россий мучко илыше марий- влакат шке коллективышт дене  Йошкар-Олаш пайремым палемдаш толыт.
              Республикым вуйлатыше Юрий Зайцев Марий Элысе калыкым да уна- влакым Пеледыш пайрем дене саламла. Тиде пайрем пӱртӱс ылыжмым, илыш пеледмым, шочмо кундемым йӧратымым ончыкта. Пашам йӧратымашым, марий калыкын йӱлажын икгайлыкшым да тукым гыч тукымыш куснен толмыжым чапландара. Марий калыкын тӱвыраже Российын шуко калыкшын поянлыкше дене ваш кылдалт шога. Пеледыш пайрем- тиде шошо ага пашам мучашлыше мланде пашаеҥ- влакын гына пайремышт огыл, а еш поянлыкын, калык усталыкын юарлымыже.
             Марий Эл агропромышенный комплексыште сеҥымашыже дене чынжымак кугешна да элланна качестван продукцийым ситарымаште кугу верым налын шога. Пареҥгым, саскам, моло ял озанлык культурым ыштен налмашште сеҥымаш- тиде тыршен пашам ыштымын да верысе калыкын пашалан ӱшанле улмыжын лектышыже. Тек тиде пайрем тыланда куаным, чон юарлымашым, у вийым пӧлекла. Тек кажне суртышто пиал, ваш умылымаш да пеледмаш озалана, а марий мланде мемнам шке сийже дене куадараш тӱналеш,- ойлалтеш республикым вуйлатышын саламлымашыштыже.
            Республикысе пайрем Йошкар-Олаште кок кече палемдалтеш. Таче да эрла. Таче калыкле тӱвыра пӧртыштӧ пайремын участникше ден унаже- влак паша программыш погыненыт. Таче кастенак Рӱдӧ каныме да тӱвыра паркыште «Йыр куштымаш» калык куштымаш фестиваль ден «Шаблий» киностудийын видеопроектше- влакын презетацийже эрта.
            Эрла, шуматкечын пайремын унаже- влакым лу шагатлан Ленин лӱмеш площадьыште торжественно вашлийыт. Молгунамсе семын Ленин лӱмеш тӱвыра поалт воктен огыт погыно. Ленин площадь гычак пайрем таҥошкылмаш Марий парк могырыш тарвана. Туштак тӱҥ событий- влак эртат. Тиде: пайремым почмаш, концерт, калык усталык, кудо, этноспорт фестиваль- влак да дискотека лийыт.
             Фото: Марий Элым вуйлатышын  администрацийжын увер дене пашам ыштыше пӧлкаже. (архив).

Прошлые выпуски