Кум регион Зелёный Дол деч Котельнич марте кӱртньӧ корным шуяш кумылан улыт
Кум регион Зелёный Дол деч Котельнич марте кӱртньӧ корным шуяш кумылан улыт. Тиде- Марий Эл, Татарстан да Киров область. Кӱртньӧ корным шуйымаш «Йӱдвел-Кечывалвел» кӱртньӧ корно коридорышто кӱрылтышым пытараш да товароборотым кугемдаш полша. Тидын нерген ТАСС-лан Киров областьын губернаторжо Александр Соколов ойлен. «Зелёный Дол- Яранск» кӱртньӧ корно Йошкар-Олаште тупиковый улеш. Зелёный Дол деч Яранск да Котельнич марте шуйымаш Озаҥ-Йошкар-Ола- Киров линий дене Транссибирь магистральын йӱдвел ден кечывалвел кӱртнькорныжым ушаш йӧным пуа. Губернатор палемден: Марий Эл гыч коллеге- влак кӱртньӧ корным шуяш темлымаш дене лектыныт. Тиде шӱдӧ утла меҥге шуйнышо корно чоҥалтеш гын, Озаҥ гыч Архангельск марте корно 12 шагатлан кӱчыкемеш, Юл ден Ош теҥыз коклаште грузым шупшыкташ пайдале лиеш. Кызыт корно йыр савырнен кая. Тиде аныклыме шот дене пайдале огыл. Корным шуйымо нерген йодыш каҥашалтеш, кызыт лишыл жаплан повесткыш пуртымо огыл, но ончыкылык план уло. Тудым шыҥдараш Татарстан, Марий Эл да Киров область кумылан улыт,- каласен Александр Соколов.
Фото: Павел Стариков.
Фото: Павел Стариков.
