Калыкым шотлаш тӱҥалмешке жап шуко ок код
Россий мучко калыкым шотлаш тӱҥалмешке ик тылзе деч шагалрак жап кодеш. Теҥгече переписьым эртарыме йодыш дене правительство комиссийын черетан заседанийже лийын. Тушто федерал да регионласе кугыжаныш кучем орган- влакын еҥышт участвоватленыт. Российын икымше вице-премьерже Андрей Белоусовын эртарыме видеоконференцийыште Юл кундем округышто Россий Президентын полномочный представительжын алмаштышыже Олег Машковцев лийын. Субъект- влакын ямде улмышт шотышто тӱҥ докладым Росстатым вуйлатыше Павел Малков ыштен. Тудын мутшо почеш регион- влак тиде кугу мероприятийлан кӱлын ямдылалтыныт. Совещанийыште тыгак Росстатын Росмолодёжь да Шанче ден кӱшыл шинчымаш министерстве дене студент да волонтёр- влакым переписьыш ушымо шотышто пырля ыштыме пашам каҥашеныт. Ушештарена: перепись 15-ше октябрь гыч 14-ше ноябрь марте эртаралтеш.
