Киров область Йӱдвел теҥыз корныш лекташ транзит регион лийнеже

Киров область Йӱдвел теҥыз корныш лекташ транзит регион лийнеже
Киров область Йӱдвел теҥыз корныш лекташ транзит регион лийнеже. Областьысе правительство председательын алмаштышыже Алексей Жердев ден транспорт министрже Алексей Петряков Транспорт арняште деловой вашлиймаш кышкарыште Татарстан да Марий Эл Республикыла гыч шке коллегышт дене мутланеныт. Каҥашыме тӱҥ темыже Йӱдвел теҥыз корныш лекташ регион- влакын кӱртньӧ корно дене вашкылыштым вияҥдыме планым каҥашымаш лийын. Тиде йодышым виктарен колташ задачым Киров областьын губернаторжо Александр Соколов «Ростки: Россия и Китай- взаимовыгодное сотрудничество» тӱнямбал форумын лектышыже почеш шынден. Российын транспорт логистикыже 2022-шо ийыште чот вашталтын. Грузым шупшыктымаш кечывалвел ден эрвелыш виктаралтын. «Ростки» форумышто Россий Президентын советникше Игорь Левитин палемден: кызыт элна Йӱдвел теҥыз корным вияҥдыме йодышым решатла. Ледовитый океан гоч грузым шупшыктымо корно пеш кӱлешан. Тудо кӱртньӧ корным эрыкаҥдаш полша. Кызыт эрвелыш кугу кугыт груз лач кӱртньӧ корно дене шупшыкталтеш. Тидлан кӧра Киров область деке Архангельск могырышкыла транзит регион семын интерес кугемеш. Губернатор председательын алмаштышыже Алексей Жердевлан Киров область гоч Архангельскыш транспорт кылым вияҥдыме йодышым виктараш да тиде йодышым пошкудо кундемла дене каҥашаш задачым шынден. Молан манаш гын, пошкудо кундем- влакат транспорт корным вияҥдаш кумылан улыт. Йодышым пырля виктараш пашаче группым ыштыме, кӱртньӧ корнын кушеч кайышаш маршрутшым каҥашыме. Транспорт кылым вияҥдыме шотышто темлымаш проектым ямдылена,- каласен Алексей Жердев. Фото: Павел Стариков.

Прошлые выпуски