Марий Элым вуйлатыше оласе проблеман пӧртым да чоҥымо дамбым терген

Марий Элым вуйлатыше оласе проблеман пӧртым да чоҥымо дамбым терген
Марий Элым вуйлатышын терген шогымыжлан кӧра, Йошкар-Олаште шотде чоҥымо пашам сайын виктарен колтымо. Димитров уремысе 61-ше пӧртым чоҥен пытарашлан да чыла документым келыштараш чоҥышылан лач кок ий кӱлын. Историй 2017-ше ийын ноябрьыште тӱналын. Тунам Александр Евстифеев чоҥымо объект- влакым терген коштын. Тиде пӧртым сдатлыме годым чоҥышо компаний пӧртын ӧрдыж могыржым шокшемден огыл, а тудын олмеш шем плёнкым веле шупшын шынден. Тудыжо вашке йӧрдымыш лектын, пачерлаште пырдыж кылмаш тӱҥалын, илаш йӧндымӧ лийын. Еҥ- влак республикым вуйлатыше деч полшаш йодыныт. Адакшым пӧрт воктелсе кундемымат тӱзландарыме огыл улмаш. Вара шошым, 18-ше ийыште, тиде пӧртын пӱрымашыжым уэш кӱшнӧ каҥашыме. Тиде кечылаште Марий Элым вуйлатыше уэш тушко миен. Шуко пачеран пӧртым 25-ше ноябрьыште эксплуатацийыш налме. 90 процент пачерым ужалыме, у оза- влак ремонтым ыштат. Кудывечыште машинам шогалтыме верым 13 гыч 62 марте ешарыме, йоча да спорт площадкымат кугемдыме. Ынде верысе калыкын вуйшиймашыже уке. Александр Евстифеев тыгак Йошкар-Оласе Водопроводный урем деч Красноармейский урем марте чоҥымо аралыше дамбым ыштыме пашам терген лектын. Тудым кок ий ончыч чоҥаш тӱҥалме ыле. Кок йыжыҥ дене ыштыме. Дамбын кужытшо 750 метр. Чоҥымо пашалан федерал да республикысе бюджет гыч 101 миллион теҥге оксам кучылтмо. Тиде объект Изи Какшаныште вӱд ташлыме деч 45 пӧртым, тушто илыше 249 еҥым, йӱшаш вӱдым тулышо станцийым, электропередаче линийым, «Динамо» стадионым арала. Корно шотышто замечаний лийын гын, тудым чоҥышо кораҥдаш сӧрен. Ынде кундемым ужарташ гына кодеш.

Прошлые выпуски