Марий Эл Кугыжаныш Погынышто школлаште пашаен ситыдымашым канашеныт

Марий Эл Кугыжаныш Погынышто школлаште пашаен ситыдымашым канашеныт

           Марий Эл Кугыжаныш Погынышто школлаште пашаен ситыдымашым канашеныт. Шанче, туныктыш да самырык- влак политике шотышто комитет заседанийым эртарен да туныктымаште кадрым ситарымашым да Коркатово лицейыште малыме корпусым чонымо йодышым канашен. Кадр йодышым канашаш амалым Марий университетын ректоржо, Кугыжаныш Погынын депутатше Михаил Швецовын паша рынкым мониторитлаш да экономике отрасльым шымлаш целевой заказ системым ышташ кулмо нерген обращенийже пуэн.

             Ситуацийын могайрак улмыжо нерген туныктыш министрын алмаштышыже Валентина Гаврилова ойлен. Тудо палемден: республикыште 242 школ пашам ышта: 159-ыже ялыште, 83-шо - олаште. Педагогике пашаен- влакын чотышт 6 тужемат 400 ен, тушечын ныл тужемат 880-жо- туныктышо. Нунын кокла гыч 16 утла процентше 35 ияш марте улыт, 60 ий деч кугуракше- 21 утла процент. 20 ий да шукырак стажанже- 66 утла процент. Тений 304 самырык специалист пашаш толын. Кодшо ийысе деч кок пачаш наре шукырак. 23-шо сентябрьлан шотлымаште школлаште эше 132 вакансий кодеш. 

            Комитетым вуйлатыше Григорий Пейсахович целевой туныктымо механизмым саемдыме шотышто темлымашым ямдылаш кулеш манын. 

            Комитет тагак Морко районысо Коркатово (Кокласола) лицейлан малыме корпусым чонаш кулмо нерген обращенийым ончен лектын. Кызыт тушто 336 йоча тунемеш. 99-ыже Морко, Волжский, Звенигово, Медведево районла, Йошкар-Ола, Волжск,Звенигово ола ден Татарстан гыч улыт да школ пеленсе интернатыште илат. Туныктыш министерстве финанс министерствыш оксам ойыраш сводный йодмашым колташ шона. Тыгак шушаш ийын лицейын зданийжым капитально олмыкташ палемдыме. Тиде пашалан 68 миллион утла тенгем ойыраш ямдылат. Комитет идалык мучаш марте Коркатово лицейыште выездной заседанийым эртараш шона.

            Фото: Марий Эл Кугыжаныш Погын.

Прошлые выпуски