Марий Элым вуйлатыше Россий Правительство председательын алмаштышыже Александр Новакын эртарыме совещанийыште участвоватлен

                           Марий Элым вуйлатыше Александр Евстифеев Россий Правительство председательын алмаштышыже Александр Новакын эртарыме совещанийыште участвоватлен. Тушто элым газифицироватлыме нерген ойлымо. Вице-премьер Александр Новак палемден: газым пуртымо йодыш кӱлешан социал задача. Тиде паша шукертсек шукталтеш, поснак 2005-ше ий гыч писемден колтымо. Тиде жапыште элыште газификацийым 53 процент гыч 70 процент марте нӧлталме. Но тиде эше шагал. Регионлаште утларак илем- влакым авалтыман. Тудо тыгак палемден: Российын президентше ыштышаш паша планым ямдылаш кӱштен. Тудын тӱҥ задачыже семын  субъект- влакым 2024-ше да 2030-шо ий- влаклан утларак газифицироватлымаш шотлалтеш. Марий Элыште Президентын кӱштымашыжым шукташ пашаче группым ыштыме. Калыкын оксажым кучылтде газ деке ушаш оксам кушеч ойырымо шотышто 2023-шо ий марте расчётым ыштыме. Тиддеч ончыч увертарыме ыле: Александр Евстифеев ден «Газпромым» вуйлатыше Алексей Миллер дене 2025-ше ий марте уэмдыме программым пеҥгыдемдыме. Тудын дене келшышын шушаш вич ий жапыште республикысе 53 ял ден посёлкылашке канде тул толшаш. Тиде жапыште 4 миллиард утла теҥге инвестицийым кучылташ палемдыме.

Прошлые выпуски