Марий Элым вуйлатыше Юрий Зайцев «Тӱвыра» калыкле проект шотышто совещанийыште участвоватлен
Марий Элым вуйлатыше Юрий Зайцев «Тӱвыра» калыкле проект шотышто совещанийыште участвоватлен. Видеоконференций кыл йӧн дене Россий Правительство председательын алмаштышыже Татьяна Голикован эртарыме совещаний калыкле проектым илышыш кузе шыҥдарыме йодышлан пӧлеклалтын. Совещанийыште Юрий Зайцев дене пырля тӱвыра печать да калык- влакын пашашт шотышто министр Константин Иванов лийын. Тӱҥ докладым Российын тӱвыра министрже Ольга Любимова ыштен. Тудо палемден: тений проектым илышыш шыҥдараш федерал бюджет 25 миллиардат 400 миллион теҥгем ойырен. Тудын 73 наре процентшым илышыш шыҥдарыме. Тиде пашам чолган Юл кундем, Кечывалвел да Тора эрвел федерал округ- влак шуктеныт. Тиде окса дене Куженер да Оршанке районлаште ялысе тӱвыра пӧртлам пужен ыштыме, Юрино посёлкышто Лосев лӱмеш тоштерым капитально олмыктымо. Йошкар-Олаште модельный книгагудым ыштыме, Евсеев лӱмеш калыкле тоштерым, Звениговысо краеведений тоштерым, Йошкар-Олан историй тоштержым технике дене пойдарыме,, Волжск оласе ончычсо «Родина» кинотеатрым йоча сымыктыш школлан пужен ышташ тӱҥалме. Идалык мучаш марте Руэмысе йоча сымыктыш школым пужен ыштат, 2024 ийыште Марий самырык театрым уэмден шуктышаш улыт. Юрий Зайцев палемден: калыкле проект кышкарыште палемдыме мероприятий- влакым тӱрыс ыштен шукташ, шыҥдарымым терген шогаш кӱштен.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
