Марий талешке кечылан республикыште ятыр мероприятий эртаралтеш
Марий талешке кечылан республикыште мероприятий цикл эртаралтеш. Тудо «Герой- влакын корнышт дене» маналтеш. 22-шо апрельыште Марий самырык театрын сценыштыже икымше гана регион- влак кокласе кӱкшытан гармонист- влакын да калык семӱзгар оркестрлан «Самырык гармоньчо» йоча фестивальышт эртаралтеш. Тудын кышкарыштак Марий Эл да Киров областьыште погымо гармонь: тальянке, хромко- влакым ончыктышо выставке пашам ышта. 30-шо апрель марте йоча да самырык- влак коклаште «Сеҥымаш корно дене» усталык конкурсыш йодмашым налыт. Заочный ужашыштыже участник- влак кок номинаций дене таҥасат. Икымшыже- видеозапись конкурс тыгай теме- влаклан лиеш: «Мый Геройын уремыштыже илем», «Мемнан школышто Герой тунемын, «Ачамландын Геройжо- влак- мемнан змлякна», «Мый сар нерген лудам» да кокымшыжо- «Калыкле герой» книжка –раскладушко влак. Сеҥыше- влакым 10-шо майыште увертарат. 26-шо апрельыште 7 шагат эрдене Сергей Чавайнлан чапкӱ воктене «Шарнымаш сорта» йулаш пурышо акций лиеш. Тудо кечынак МАРНИИЯЛИ-ште «Марий калыкын этногенезше» йыргешке ӱстел эрта. Кумшо майын Марий университетын краеведений книгагудышто бард мурын авторышт да поэт- влак «Ме шарнена! Мы помним!» фестивальыш погынат. Мероприятий цикл шымлыме паша- влакын «Ший талешке» республике кӱкшытан конференцийышт дене 12-шо майыште Унчо школышто мучашлалтеш.
