Медведево районышто у тукым книгагудо- влакым почмо
Медведево районышто у тукым книгагудо- влакым почмо. «Тӱвыра» калыкле проект кышкарыште Руш Кукмор ялыште да Краснооктябрьский посёлкышто кок книгагудым уэмдыме. Эше шушаш ийын икымше кварталыште ик книгагудо Медведево посёлкышто почылтеш. Марий Элым вуйлатыше Юрий Зайцевын кӱштымыжӧ почеш у тӧнежлашке Правительстве вуйлатышын алмаштышыже- тӱвыра министр Константин Иванов миен. Калыкле проект почеш у оборудованийым: компьютерым, ноутбукым, шуко функциян устройствым налме, фондым йоча, сылнымут да мер-политик литературо дене пойдарыме. Марий Элым вуйлатышын мутшо почеш моделян книгагудо- влак кугыеҥ- влакынат, самырык-шамычынат кумылыштым савырат. Тидыже цифровизаций жапыште, гаджет дене шуко жапым йомадрыме годым пеш кӱлешан. Руш Кукморысо книгагудо тӱвыра рӱдерын кокымшо почашыштыже верланен. Книгагудыш 753 еҥ возалтын. Модернизаций деч вара вич ий жапыште книгагудыш толшо- влакын чотышт кок пачаш ешаралтшаш. Краснооктябрьскысе книгагудо пашан лектышыже почеш районышто ончылно кая. Тушто тӱжемат 286 еҥ обслуживатлалтеш. Кодшо ийын Медведево посёлкышто районысо рӱдӧ книгагудын зданийжым чоҥаш тӱналме. Тушто илышын йодмыжо почеш чыла лийшаш, начар тазалыкан- влакым обслуживатлашат йӧн ышталтеш.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
