Москошто туныктышын да наставникын талукшым мучашлымылан пӧлеклалтше торжественный мероприятий эртен
Москошто теҥгече туныктышын да наставникын талукшым мучашлымылан пӧлеклалтше торжественный мероприятий эртен. Тушто Марий Элым вуйлатыше Юрий Зайцев мутым ойлен. Тӱналтышыште погынышо- влак ончылно Россий Правительстве вуйлатышын алмаштышыже Татьяна Голикова, просвещений министр Сергей Кравцов, тӱвыра министр Ольга Любимова ойленыт да ыштыме паша, сеҥымаш- влак нерген палемденыт. Марий Элым вуйлатыше Юрий Зайцев каласен: туныктышын да наставникын идалыкше регионлан кугу йӧным пуэн, профессийым келгынрак ончалаш, туныктышо кузе ила, мо нерген шона, мо тудым тургыжландара, мо дене полшаш лиймым пален налынна. Ме икымше гана школыш пашам ышташ толшо- влаклан кумылаҥдыше оксам тӱлаш тӱҥалына. Тиде идалык туныктышо- влаклан ме могай тӱткышым ойырышаш улына, тудым ышташ шӱкалтыш лиеш,- палемден Юрий Зайцев.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
