У ий пайрем жапыште Йошкар-Ола ден Моско коклашке ешартыш поезд- влакым колтат
У ий пайрем жапыште Йошкар-Ола ден Моско коклашке ешартыш поезд- влакым колтат. Нуно йодмаш дене пайдаланыше корнылаште 28-ше декабрь гыч 8-ше январь марте кошташ тӱҥалыт. Горький кӱртньӧ корно сайтын ончыктымыжо почеш 29-ше декабрьыште Йошкар-Ола гыч Москош кок состав кая, 19 шагатат 26 минутышто план почеш рейс лиеш. Ешартыш поезд кечывалым 12 шагатлан кая, ныл шагат эрдене миен шуэш. Билетын акше кок тӱжемат 748 теҥге. Ешартыш поезд тыгак рӱдӧ марий ола гыч 5-ше январьын тыгак 12 шагатлан кая. Билетын акше кок тӱжемат 398 теҥге лиеш. Нылымше да 8-ше январьыште Йошкар-Ола гыч рейс уке. Моло кечынже план почеш 19 шагатат 26 минутлан тарвана. Таче Моско гыч Йошкар-Олаш кок состав лектын. 29-ше ден 30-шо декабрьыште поезд уке. 31-ше декабрьыште 16 шагатат 38 минутышто тарвана, 9 шагатат 10 минутышто верышке миен шуэш. Билетын акше кум тӱжемат 882 теҥге. СВ вагонышто шергырак. Икымше январьыште поезд уке. 4-ше январьыште кок поезд: ик шагатат 40 минутышто да 16 шагатат 38 минутышто. 2, 3, 5, 6, 7 да 8-ше январьыште расписаний почеш коштыт.
