Республикысе район- влакын Кугу Сеҥымашын 75 ияш лӱмгечыжлан кузе ямдылалтмыштым кум номинаций дене аклаш тӱналыт
Республикысе муниципал обарзований- влакын Кугу Сеҥымашын 75 ияш лӱмгечыжлан кузе ямдылалтмыштым кум номинаций дене аклаш тӱналыт. Эн сай районым кузе аклен ойыраш палемдыме, - тидын нерген Республикым вуйлатыше Александр Евстифеев ден кӧргӧ политике, верысе самоуправленийым вияҥдымаш да юстиций министр Михаил Данилов дене вашлиймашыштышт ойлымо. 2020-шо ийым Российын Президентше Шарнымаш да Чап идалык семын увертарен. Республикыште Кугу Сеҥымаш кечылан ямдылалтмаш икмыняр корно дене шукталтеш. Тушкак кажне районышто историй шарнымашым арален кодымашке виктаралтше мероприятий- влакым эртарымаш пура. Республикым вуйлатыше ик форумышто патритоизм шӱлашеш шуарыме паша дене эн сай районым ойырымо нерген ойлен ыле. Сеҥымаш кече вашаш икмыняр показатель дене конкурс лийшаш. Тудлан кызыт ямдылалтмаш кая. Сомыл кузерак воранен толеш? Министр кум номинацийым ыштыме нерген ойлен. Икымшыже- мер ушем- влакын патриотизм шӱлышеш шуарыме пашашт да Сеҥымашлан ямдылалтмаш. Кокымшыжо- увер да савыктыш паша. Кумшо корныжо - у мемориал комлексым, чапкӱм, обелискым ыштыме, тойымо верым сайын кучымо паша. Чыла тидыже Михаил Даниловын мутшо почеш, историй шарнымашым арален кодаш тыршыме пашам аклаш полша. Вашлиймаш мучашыште Александр Евстифеев тиде пашашке районлам вуйлатыше- влакым ушаш кӱштен. Сеҥымаш кечылан ямдылалтме сомыл нунын виктарымышт почеш эртышаш манын каласен.
