Республикыштына вич йочан ныл тӱжемат 500 ава ончылгоч пенсийым налеш
Ава-влаклан полышым пуымаш кугыжаныш политикын ик эн ончылно шогышо задачыже. Йочам ыштымаш да тудым ончен-куштымашын социал значенийже пеш кугу. Санденак Российыште ӱдырамаш- влак пенсийышкат ондакырак лектыт. А шуко шочшан- влаклан ешартыш льгото уло. Вич але утларак икшывым ыштыше да 8 ияш марте ончышо ӱдырамаш- влаклан ийгот шот дене страховой пенсий 50 ий гыч палемдалтеш. Тыгак 2019-ше ий гыч кум да ныл шочшан ава- влаклан ончылгоч пенсийыш лекташ правам пуымо. Ӱдырамашын кум йочаже уло гын, у пенсий ийгот почеш кум ийлан ондакырак канаш каен кертеш, ныл йоча гын, ныл ийлан ондак. Тидын годым ӱдырамашын 15 ий страховой стажше лийшаш. Тиддеч посна изи гычак инвалид улшо йочам ончышо ава 50 ий гыч пенсийыш лектын кертеш. Республикыштына вич йочан ныл тӱжемат 500 ава ончылгоч пенсийым налеш. Кум але ныл йочам ыштыше вич тӱжемат 500 наре ӱдырамаш ончылгоч пенсийыш лекташ правам налын.
