Сенатор Сергей Мартынов У Торъял районыш миен
Марий Элын Федераций Советысе представительже Сергей Мартынов Марий Эл Кугыжаныш Погынын депутатше Владмир Кожанов дене пырля У Торъял районысо «Первый май» колхозышко миен коштыныт, агропромышленный комплексын пашам ыштыме куатше дене палыме лийыныт. Тудым вуйлатыше Аркадий Новиков предприятийын вияҥме корныж нерген ушештарен. 90-ше ийлаште колхоз шуко нелылык деке тӱкнен. Тунам тудо йытым куштен, но элыштына тиде пашам кудалташ тӱҥалыныт, сӧснам ончымашым агрохолдинг-влак алмаштеныт. Предприятий шӧрым ыштен налме пашам ойырен. Ферме-валкым чоҥеныт, вольык урлыкым саемденыт, шкаланышт кормам шке ситараш тӱҥалыныт. Ий еда вольык кӱтӱ кугемеш, шӧр лӱштыш кушкеш. Тачысе кечылан «1май» республикыштына ик эн ончыл ял озанлык предприятийлан шотлалтеш. Сенатор Сергей Мартынов пашам кӱкшын аклен.
