Шернурлан 270 ий темын
Кодшо шуматкечын Шернур посёлко шкенжын 270 ияш лӱмгечыжым палемден. Игече йӱран лийын гынат, тудо пайрем кумылым волтен огыл. Пайрем мероприятийыште Республикым вуйлатыше Александр Евстифеев лийын. Тудо верысе калыкым кугу пайрем дене саламлен да тыге каласен: Шернур шке кундемжым элна мучко чапландарыше ятыр лӱмлӧ еҥын шочмо кундемже улеш. Нунын коклаште поэт- влак Йыван Кырла ден Николай Заболотский, Олимпий чемпионка Нина Селюнина-Рочева да молат улыт. Районышто ял озанлык сайын вияҥын, корно- влак чоҥалтыт, тӱвыра пӧрт да тӧнеж- влак олмыкталтыт. Вуйлатыше верысе калыкын районысо илышым саемдымашке чолган ушнымыжымат палемден да ушештарен: 21-ше августышто калыкын тӱналтышыжлан полшышо толкынын Республике кӱкшытан кумшо форумжо лиеш, ӧрдыжеш ида код, манын. Верысе калыкым пайрем дене Федераций Советын аппаратшым вуйлатыше Сергей Мартыноват саламлен. А Шернур район администарцийым вуйлатыше Сергей Адиганов поро шомак дене пырля ойыртемалтше- влаклан наградым кучыктен. Палемдалтше еҥ- влак коклаште ял озанлык пашан ветеранже Елизавета Березина, туныктымо пашан ветеранже Ираида Овечкина, «Восход» колхозым вуйлатыше Владимир Смоленцев, Шернур РайПО-м вуйлатыше Валерий Бердинский, рӱдӧ эмлыме верын врачше Галина Шабдарова, «Колокольчик» йоча садым вуйлатыше Надежда Четкарёва, котельныйын операторжо Виталий Арсланов, Койсола книгагудым вуйлатыше Надежда Пирогова улыт. Куд еҥ Шернур посёлкын почётан гражданинже лийын.
