Волжский районысо самырык тукымын форумжо мучашлалтын
Теҥгече Яльчик ер кундемыште Волжский район гыч ялысе самырык тукымын форумжо мучашлалтын. Тудо кум кече жапыште «Олимпиец» лагерь негызеш эртен. Самырык тукымын йодышыжо, нунын профессионал мер куатыштым вияҥдаш полшымаш- республикын ончыкылыкшым ыштымаште кӱлешан задаче. Форумышто ӱдыр- рвезе- влак у шинчымаш ден моштымашым налыныт, шке пашашт дене палдареныт, наставник- влак деч тунемыныт. Форумын программыже пеш поян лийын. Тушто шинчымашым пуышо площадке, оҥай еҥ- влак дене вашлиймаш, мастер-класс да тренинг, спорт таҥасымаш- влак лийыныт. Вашлиймашке район гыч 18-35 ияш еҥ-влак погыненыт. Нуно районым вияҥдыме нерген шонымашыштым ойленыт, вуйлатыме сомыл дене палыме лийыныт, паша опытышт дене палдареныт, эксперт- влак дене вашлийыныт. «Этномода», «Калык юрист», «Тыныслын да ваш келшен илаш тунемына» проект- влакым ончыктеныт. Форум «Ял: шинчымашан, чолга, мыйын» теме дене йыргешке ӱстел йыр мутланымаш дене мучашлалтын.
