Театр фестивальым иктешлыме
«Йошкар-Ола театральный» фестивальым иктешлыме. Лауреатше- влакым саламлыме церемоний теҥгече Республикысе курчак театрыште лийын. Погынышо- влакым тӱвыра министр, театр пашаеҥ- влак Ушемын марий пӧлкажым вуйлатыше Константин Иванов саламлен ойлен. Фестивальын Гран-прижым Эрик Сапаев лӱмеш опера да балет Марий Кугыжаныш академический театрын «Кум мушкетёр- влак» мюзиклже ден Шкетан лӱмеш марий калыкле драма театрын «Гамлет. Машина. Цемент» спектакльже налыныт. Сеҥыше- влакым тыгак номинацийлаште палемдыме: Эн сай режиссурылан Степан Пектеев, Эн сай сценографийлан Екатерина Андреева, Эн сай актёр ансамбль- чыланат Шкетан театр гыч, Тиде театр гычак Алексей Тетерин ден Иван Смирнов, Курык марий театр гыч Николай Марышев палемдалтыныт. Театр пашаеҥ- влак Ушемын премийжым Светлана Строганова, директорын премийжым Василий Домрачев налыныт. «Йошкар-Ола театральный» фестиваль 19-ше гыч 27-ше март марте эртен. Конкурсыш 12 спектакльым лукмо ыле.
Фото: Тӱвыра министерстве.
Фото: Тӱвыра министерстве.
