Йошкар-Оласе нылымше номеран поликлиникым кызытсе жаплан келшыше медицина оборудований дене пойдарыме
Йошкар-Оласе нылымше номеран поликлиникым кызытсе жаплан келшыше медицина оборудований дене пойдарыме. Поликлинке кок ий жапыште 74 миллион утла тенгелан медицина оборудованийым налын. Поликлиникын тӱн врачше Руслан Мустафаев у прибор- влакын достоинствышт нерген ойлен. Нуно диагностикым да пациент- влакым эмлымашым палынак саемдат, - каласен тудо. Цифран рентген маммографлан кӧра сӱрет- влакым ешарен цифроватлаш ок кӱл. Ынде поликлиникыште чыла рентген технике цифран улеш. Сандене уверым вашке гына рентген снимке рӱдерыш кусараш лиеш, а рентгенолог- влак шке кабинетыштышт чыла мониторышто ончен, рашемден возен кертыт. Врач- влак тыгак шодым тергыше рентген аппаратлан кӱкшӧ акым пуэныт. Кодшо ийын гына тудын дене 41 тӱжемат 278 шымлымашым эртарыме, тений- 30 тӱжем нарым. Кодшо ийын тыгак рентген диагностике телевиктарыше «Полидиагност» аппаратым, у УЗИ аппаратым налме. Цифран шуко каналан электрокардиограф тыгак йодмаш дене пайдалана. Тазалыкаралтыш министерствын ончыктымыжо почеш «Первичный звеном модернизироватлымаш» регионысо проектым шыҥдараш тений 468 миллион теҥгем колташ палемдыме. Октябрь тӱналтышлан планым 71 процентлан темыме.
