Йошкар-Олаште у школ омсажым почын

Шинчымаш кечын икымше сентябрьыште Йошкар-Олаште 31-ше номеран у школ омсажым почын. Рӱдӧ олаште у тунемме тӧнежым ятыр ий дене вученыт, теве тиде кече толын шуын. Тудо поснак тургыжландарыше ыле у школыш икымше классыш толшо- влаклан. Нуныжо тений 276-ын улыт. Школым вуйлаташ Евгений Николаевым шогалтыме. У тунемме ий тӱҥалме дене школым торжественно почмаште тунемше да туныктышо- влакым Марий Элым вуйлатыше Александр Евстифеев саламлен. Тудо палемден: у школым 30 ий вучымо. Тудо воктелсе моло школым изиш куштылемдаш полша. Школым чоҥаш 270 миллион теҥгем кучылтмо. Шӱдӧ миллион наре теҥгеже мебельым, оборудованийым, компьютерым, спорт ӱзгарым налаш каен. У школым ультра современный манаш лиеш: чапле тунемме кабинет- влак: кок информатике кабинет, ныл мобильный компьютер класс, робототехнике да 3Д моделирований класс- влак. Тиддеч посна рвезе- влаклан пушеҥгым да кӱртньым обрабатыватлыше, ӱдыр- влаклан кулинарий, ургымо да пӱчкедыме кабинет- влак улыт. Биологий кабинетыште электрон микроскоп- влак, йот йылмым тунемаш лингафон оборудований, сӱретлыме  кабинетыште мольберт- влак, коридорышто сото телефиным зарядитлыме вер- влак улыт. Чыла тидым школыш тунемаш толшо- влак аклен кертыт. Нуно 41 классыште тунемаш тӱҥалыт. Тушечын 10 классше- икымше классыш толшо- влак.

Прошлые выпуски