Александр Евстифеев Юрино районым социал-экономик велым вияҥдыме йодыш дене совещанийым эртарен

                 Юрино районыш мийыме кышкарыште Александр Евстифеев районым социал-экономик велым вияҥдыме йодыш дене совещанийым эртарен. Юрино район администрацийым вуйлатыше Марина Шихова тӱҥ экономик показатель- влак дене палдарен. 2018-ше ий гыч кугу инвестиций проектым «Инструменталлык вурсым лукмо шотышто заводым чоҥымо» пашам шыҥдараш тӱҥалме. Таче кечылан завод 80 процентлан ямде. Тудо талукышто шым тӱжем тонн проукцийым лукшаш. 70 деч шагал огыл пашавер лекшаш. Объектым 2022-шо ийыште ыштен шуктышаш улыт. Марина Шихова тидымат палемден: Республикым да правительствым вуйлатышын полшымыж дене шуко пачеран пӧртын леведышыжым, Васильевысе тӱвыра пӧртым да кыдылаш школым олмыктымо. Юринышто стадион чоҥалт шукталтеш. Тудо кыдалаш школлан сай спорт базе лийшаш.
                     Александр Евстифеев вӱдпучын, йӱшаш вӱдын качествыже, газ пучым шупшаш газ дене мыняр еҥын пайдаланаш шонымымыж нерген йодыштын, туризмым вияҥдыме да унагудо комплексын могайрак улмыж нергенат умылкален. Туризмым вияҥдаш районын кугу потенциалже уло, унагудо номер- влак Шереметев замкыште улыт, тыгак кок хостел пашам ышта. Каҥашымашке кужун чоҥалтше 39 пачеран илыме пӧрт нергенат йодышым лукмо. Тудым 63 процентлан ыштен шуктымо. Районышто корным чоҥымо йодышымат тарватыме. Тиде пашалан тений 300 миллион теҥге ойыралтеш. Юрино гыч Сумки села марте паромым колтымо шотышто технический заданий ышталтеш. Вашлиймаш мучашыште Александр Евстифеев Марий Эл правительствын Юрино район шотышто паша лектышыже да задачыже- влак дене палдарен.

Прошлые выпуски