«Автомобильын водительже» профессий дене мастарлыкым тергыме конкурсым иктешлыме
Профессионал тунемме тӧнежлаште шинчымашым погышо- влаклан «Автомобильын водительже» профессий дене мастарлыкым тергыме конкурсым иктешлыме. Конкурс теҥгече Медведево посёлкысо автодорожный техникумышто эртен. Тушко куд тунемме тӧнеж гыч 10 тунемше ушнен. Тиде- Арде профессионал техникум, Марий чодыра озанлык, Автодорожный, Оршанкысе шуко профилян колледж, аграрно- строитель да транспортно- энергетик техникум улыт. Теорий ужашыже тест семын лийын. Тудлан 20 минут ойыралтын. Практике ужашыже ныл заданиян лийын. Тушто смене еда автомобильым техник обслуживатлыме да оравам вашталтен моштымым, ДТП-ште икымше полышым пуымо, машинам вӱдымӧ годым чаткан да ласкан кудалме мастарлыкым ончыктыман ыле. Жюрилан чот тыршаш логалын. Участник- влакын лектышышт шӱдаш ужаш дене гына ойыртемалтыныт. Тыге икымше верым Автодорожный техникум гыч Марк Шевцов налын, кокымшыш Оршанкысе шуко профилян колледж гыч Руслан Поярков ден Даниил Мацкевич лектыныт. Кумшо вер Арде профессионал техникум гыч Артём Тарасов ден Марий чодыра озанлык техникум гыч Константин Афанасьевлан логалын.
Фото: Архив.
Фото: Архив.
