Изи Какшан эҥер серыште идалык мучаш марте «Й буква» арт-объектым вераҥдат
Изи Какшан эҥер серыште идалык мучаш марте «Й буква» арт-объектым вераҥдат. Тудым ямдылаш, вераҥдаш да волгалтарыше конструкцийым чӱкташ Йошкар-Ола мэрий ик миллионат 200 тӱжем теҥгем кучылташ шона. Кызыт заказчик подрядчикым кычалеш. «Й буква» арт-объект муниципал образованийын тӱшка кумдыкшым вияҥдыме ик проект улеш. Тыге турист- влакын коштмо рӱдӧ вер тӱзландаралтеш. Тудо «2025-ше-2030-шо ийлаште Республикыште туризмым вияҥдымаш» регионысо кугыжаныш программе шотышто Йошкар-Олан турист кодшо дене келшышын ышталтеш. Пеҥгыдемдыме эскиз ямде. Арт объектын кӱкшытшӧ кум метр утла, лопкытшо кок метрат 20 сантиметр, кӱжгытшӧ- пел метр. «Й» буквам эҥер сереш, Эшкинин уремысе 8-шеБ пӧрт тураште вераҥдат.
