Калтаса районышто «Ший кандыра» фестиваль эртен
Пошкырт велысе Калтаса районышто «Ший кандыра» фестиваль эртен. Регион- влак кокласе кӱкшытан Луымшо лӱмгече фестивальыш 30 утла коллектив погынен. Икымше фестивальже 2011-ше ийыште эртен ыле. Тунам тӱжем метрыш шуйнышо Кандыра куштымаш дене рекордым шындыме, а 2013-шо ийыште куштымаш кок тӱжемат 300 метрыш шуйнен да Тӱнямбал рекордым ончыктымо. Эрвел марий- влакын куштымашышт Российысе «Гиннес рекорд- влак книгаш» пурталтын. Тиде гана пайремыш Башкортостан, Марий Эл, Татарстан, Свердловск область гыч участник- влак миеныт. Фестиваль-конкурсын Гран-прижым Россий калык усталыкын сулло коллективше, Олык Ипай лӱмеш самырык- влакын кугыжаныш премийжын лауреатше, Тамара Дмитриева лӱмеш мурышо да куштышо «Эрвел марий» калык ансамбль сулен налын. Тудым Олык Ипай лӱмеш Кугыжаныш премийын, Марий Эл Правительствын «Калыкын чонжо» премийын лауреатше, Марий Элын сулло артистше Борис Дмитриев вуйлата.
Фото: «Ший кандыра» фестиваль ВК-ште.
Фото: «Ший кандыра» фестиваль ВК-ште.
