Йытын уэш пасуш пӧртылеш
Марий Эл правительстве ден «Йытын ушем» йытын отрасльым вияҥдыме да тудлан полшышо регион- влак кокласе мер фонд вашкыл шотышто соглашенийым пеҥгыдемденыт. Документеш шке кидпалыштым Александр Евстифеев ден «Йытын ушем» фондын попечитель советшым вуйлатыше Виктор Иванов пыштеныт. Ойпидышым Тверь областьыште теҥгече йытын пасун Россий кӱкшытан кечыжым палемдыме мероприятий кышкарыште пеҥгыдемдыме. Йытын пасу кечыште Россий правительстве председательын алмаштышыже Алексей Гордеев лийын. Вашкыл увер, аналитике, эксперт да шанче аланыште лийшаш. Соглашенийын тӱҥ цельже- йытын комплексым уэш вияҥдымаш, йытыным ончен-куштымо да мушым ыштыме проектым илышыш шыҥдарымаш. Паша программе жапыште Марий Элым вуйлатыше Александр Евстифеев Торжок районысо Мирный посёлкышто йытын отрасльыште шумо кӱкшытым ончыктышо выставкыште лийын. Туштак «Российысе йытын комплексын ончыкылыкшо: вияҥме тӱҥ корно- влак» теме дене пленарный сессий эртен. Александр Евстифеев палемден: Марий Эл йытыным эре ончен-куштен. Но пытырыш ийлаште тудо мондалтын. Теве кодшо ий гыч пашам уэш чолган тӱналме. Но йодыш- влакат улыт. Тиде- сай нӧшмым налмаш, ончен-куштымо технологий да вара мушым, кӱляшым ыштымаш. Кызыт йытыным ончен-куштышо-влакын пашадарышт кугу огыл, нунымат виктараш кӱлеш. Пеҥгыдемдыме соглашений нине йодышым радамлен колташ полшышаш. Вара федерал кучем могырым йытыным-ончен куштышо- влаклан полыш кӱлеш. Технологийым ямдылыме, урлыкаш нӧшмым куштымо, машиностроений йодыш- влак ончыко лектыт. Марий Элыште машиностроитель завод уло. Кӱлеш техникым лукташ конкурсыш ушнаш ме ямде улына,- каласен Евстифеев. Марий Элыште 1976-шо- 1985-ше ийлаште йытыным куд тӱжемат пеле гектареш куштымо. 30 озанлык тиде пашам шуктен. Вара тиде сомыл иземын. Йытыным 200 гектарыште гына кушташ тӱҥалме. Тений тиде кушкылым 906 гектареш вераҥдыме. Тудым Оршанкысе «Йытын» агрохолдинг, Шернурысо «Родина» да Советский районысо «Рассвет» озанлык куштат. 2024-ше ийлан «Йытын» агрохолдинг йытын пасум ныл тӱжем гектар марте кугемдаш шона.
